Bloggroll

Pages

Monday, March 28, 2011

الحكي الصح

هاد الحكي الصح
شوفو الحكي الموزن عند ٢:١٠
يسلم لسانك ويطول عمرك




أنا ما كنت صاحي يوم الجمعة من كعكة انفلونزية جابت خميري من نص الاسبوع
بس اشي بسم البدن لما بشوف فيه الاخ بسب على اخوه ويضربه بالحجار

يوم اسود

Sunday, March 20, 2011

إعلان وائل غنيم الممنوع من العرض

Friday, March 18, 2011

الــقذافـي بـ لوك جديد
























Saturday, March 12, 2011

شووو لزيييييييز

انا سعيدددددددددددددددد
انا فرحانننننننننننننننننن


اليوم كنت بتخمخم في البيت و ماميتو لكعكي حكتلو يزوبع يجيب كيس مابعرفشو من عند صاحبتها الي ساكنة بعيييييد يعني في اخر ضاحية الرشيد
فا جبتلها كيس ال ما بعرفشو من عند الانتي و انا في طريق العودة قررت اشتري بيبسي فوقفت عند محل في اللضاحية و عم بستنى يحاسب العمو اللي شكلو قبض راتبه قبل شوي و شاري نص المحل، فلقيت بوكسه مصغرة مجلتنه و بقرب زقمي الازرق عشان اشوف شو فيها فطلع فيها.................
حلقوم!!!!!!!!!!!!!
يا ويلييييييييييي يا ويلي و حق البوكسة دينار و عشر قروش وووووووووهههههههووووووووو
يعني اخر مرة اكلت حلقوم كنت قد الفطعة

ايمتى اكلتو حلقوم اخر مرة؟؟؟؟

انا سعييييييييييددد
انا فرحاااااااااننننننن

الي جا عبالو يتفضل ما عدا رين الها قضمة فقط لا غير و تصرف للمستفيد الاول فقط

أنا بدي اعيط

انا  بدي اعيط


عم بحاول اعمل زيكم يا مقلعين و اغير في التصميم عشان اصير كول على طول

يعني صرت افهم سي اس اس و الجادجت وما بعرف شو
بس مو عارف ازبط ال ريسنت كومنت

الالوان زفت اسود زي الى على سطوح دارنا و بدي اياهم زي الالوان التانية
و البلوج زفت ما بخليني
يعني بعجبو البلوج سبوت اني افيز على امريكيا شيكا بيكا و احرق حالى على باب جوجل؟ عشان يخلوني اغير اللون
اجولكو انا بدي اعيط

و عشان يكون حرقي لاهداف سامية  عدا عن موضوع الالوان رح اضيف عل القائمة:
  • شرف الامة العربية المهدور من يعني عدة عقود
  • كل مظلوم في الوطن العربي
  • كل جوعان و محتاج في الوطن العربي و العالم
  • كل واحد سيارته ابتخرب في ازنخ الاوقات و انه مو حافظ ولا رقم وموبايلو خالصة بطاريته
  • كل واحد ابوه و امه عندهم فيسبوك و هو لأ
  • كل واحد مديره ازنخ من الزناخة و اكبر منه حجما ما ابتقدر تضربو
  • كل واحد طعمى قطة و عضتو لانه تاخر في اللقمة الى بعدها
  • كل واحد غرفته ملزقة بغرفة جيرانه و مضطر يسمع سواليفهم الطرمة اللي تبدا من بعد منتصف الليل
  • مش طايق اشوف موضة شعر الواكس على  شعر شبابنا اللى برفع الراس
  • ما في ولا محل حلويات - مخبز رضى يتبناني و يطعميني قد ما بدي
و في النهاية زي البداية
انا بدي اعيط

Thursday, March 10, 2011

ديلفري لويسبر، أغنيلكم؟ الجزء الثاني

Wednesday, March 9, 2011

أغنيلكم؟

Tuesday, March 8, 2011

مقهى جفرا والمفاجئة الجميلة

يا جماعة الخير، كعكي سمع عن مقهى جفرا كمشة مرات، ولأنو بابا وماما كعكي ما بسمحولي أتأخر باليل لانو بخافو على ولي العهد أنا كعكي الاول ما رحت عليه.

المهز طلع الحج والحجة علي عرس و قالولي انه بدهم يتأخرو ، فرنيت عل الشباب ونزلنا على البلد، ما أحلى البلد باليل،،فرّينا شوي بالشوارع وانتهينا جوات جفرا

عنجد المحل حلو و الاتموسفير يعني بجنن، محسوبكو كعكي كان كرشو مقعر من الجوع لانه الحجة طابخة اشياء خظرا من النوع الي ما بياكلها محسوبكو

قلت بحالي خليني أعبي كرشي، لسا الراتب ما طار، فطلبت ما لذ وطاب، وبسألني الجرسون شو بدك تشرب، فعلى طول قلتله بيبسي لو سمحت، فكانت الصاعقة، قلي ما في بيبسي، إحنا مقاطعينوه، بس عندنا بديل، طبعا أنا كنت بحالة ازبهلال، لانه ما توقعت اشي مثل هيك، قلتلو ماشي... هات البديل....

قعدت افكر بحالي، محل مثل هيك، كثير من زواره أجانب، وبقاطع البيبسي... وأكيد اشياء اخرى
والله انه رائع، والله انه هاد الشغل الصح، هاد هو الانتماء لقضية... هيك الرسالة ممكن توصل بطريقة سلمية، الزوار الأجانب رح توصلهم رسالة ضمنية وممكن يفكرو ولو لثانية من الزمن ليش هاد المحل الذي هدفه ربحي في نهاية المطاف بلغي مشروبات ولو رخيصة الثمن ولكنها مطلوبة بشكل متواصل، والزوار المحليين يمكن يصيرو يقاطعو كمان، وهيك ممكن نهز و لو شعرة من الخنازير الرأسماليين المواليين لاعدأنا

طبعا الجرسون أخذ المنيو بعد ما طلبنا، كنت حابب انتبه شو في اشياء اخرى مقاطعينها، بس شت انتباهي عن الموضوع لانه كان في اكمن بنت شقرا بطلعو علي وعلي زراقي اللي ما في منو.

كعكي سفح الكثير من الكبة، صحن فتة، البديل عن البيبسي كان مش زاكي، و فنجان قهوة من الاخر و نزلنا على محلات ال د ف د، سطينا على اكمن د ف د من ابو النيرة و زوبعت على الدار

بس المحل حلو كثير واتجاهه السياسي برفع الراس، والله يكثر من الأعراس عشان اهلي يتأخرو و أنا ادور على حل شعري في جفرا، و يا ريت كثير من المحلات تتبع نفس المنهجية.

ما عندي أدنى مشكلة يقاطعو اي اشي ، المهم ما يقربو على مكونات الكعك.




Friday, March 4, 2011

القذافي... بكل صراحة، و انحدار مستوى قناة العربية

اولاً ...
عنفه و دمويتة إشي بسم البدن، وطخه او سحله شرعا يجوز (لازم أفتي)


بس بصراحة.... بموت فيه أنا، وبحب انفصامه، وبعشق جنون العظمة تبعته
يعني بصراحة دائماً عنده إشي جديد، غير متكلف، ازيائه من سيدار، وبطلع بالمواصلات العامة زي التك تك، وساكن بخيمة، يؤمن بالمساواة بين الأنثى والذكر، والدليل حارساته... بشرب شاي، وبسولف بمصطلحات ربما مبهمة لنا ولكن علي مستوى القعدة في ليبيا (المصطلح الليبي ل على مستوى القعدة هو إنجعمز و إنهدرز)

مش زي البقية، خطاباتهم المتعالية المتعجرفة، إصلاح كذب، والتصدق علي الفقراء من مصاري الفقراء اصلا، وبيع لحم الفقراء وأراضي الدولة للمحتل الاجنبي ... تبت أيديكم لعنتكم الآلهة و سوف يأتي يومكم آجلاً ام عاجلا وتحاسبون أيها الطغاة..

الزلمة مجنون، ولو يرجع الزمن شوي (الا ليت الشباب يعود ... مع تنهيدة طويلة) كان بدرس علم نفس و بعمل ماجستير علي موضوع "تأثير تغيير ازياء القذافي علي القابه، تأثير عكسي ام طردي" ودكتوراه على شخصيته بعد الحصول على لقب امير المسلمين

لو ابن خلدون لسا عايش كان مقدمته كانت عن القذافي

كنت بلعب على اليوتيوب شوية و ببحبش على القذافي... يا حرام .... إشي بصراحة برفع الراس
نازل طخ علي ملك السعودية، إشي نهفة.

-----------
ثانيا قناة العربية الهابطة:

يعني لما انفضحو على قصة تغطيتها لمصر، وانحيازها ل البقرة الضاحكة و الحزب الحاكم، الشباب صارو يحكو انهم انعدلو شوي وصارو يغطو بشكل احسن

أنا تبْعت على العربية لتغطيتها لليبيا و بقدر احكي و بقلب قوي انهم انحدروا لمستوى لا مثيل له، يعني صّفو مثل قنوات الفضائح الاجنبية، بدورو على اشياء وسخة عنهم ونازلين يشلو بعرض المجنون وعائلته

يعني الجميع بعرف انه الجزيرة نازلة طخ بالدول العربية الغير خليجية بس على الاقل في مهنية و مستوى
وإذا ما سمعتو... في إشاعات واخبار قوية انه صار في محاولة انقلاب عسكري/عائلي في قطر بس طبعا الجزيرة وغيرهم ما جابو سيرة

في النهاية يا جماعة الخير....
ما علي عتب، أنا كعكي، مهسهس من يوم يومي ومسطل من النعس، خايف أنام عشان أبوي وامي رح ينبطوني كتلة بعد ما يصحو، كنت جوعان وبتفرج على مسلسل اهداف ريال مدريد وباكل كعك بعد ما أحط عليه شوكلاتة من ام الربع نيرة التقليد الي شكلو زي معجون الأسنان ولغمطت الكنابية كعك وشوكلاطة، ولما أجيت انضف..... خبصت بزيادة

جود نايت