القط الكركي أقوى نوع

تحشيييييييييش شكلو معطيها منسف كركي
السؤال اللي بطرح نفسه:
هل من الممكن انه شيشاني يصير فيو هيك في مؤته؟

كعكي ذو الطفولة المعذبة

يا جماعة الخير بدي اسولفلكو عن ذكرى مرعبة جدا ومن يوميتها صرت انا كعكي الي شايفينه فوق في اعلى الصفحة

في يوم اغبر من الايام لما كنت لساتني كعكي صغير من نوع ابو ريحة إعععع صار في لمة الصبح كالعادة بين الجارات المقربات و ام كعكي و جدة كعكي عفنجان القهوه الصباحية الي من النوع الى بنحكا فيو جميع المواضيع السياسية والإقتصادية و الغذائية والنميمة وكل اشى ممكن تتخيلوه و بالنهاية تم تحديد يوم الجمعة القادم انه رح يطبخو اكلة بتشهي و الكل مشتهيها.

كنت انا كعكي ابو ريحة معطل من المدرسة عطلة نهاية السنة و على راي ستي كنت انا ايامها : قرد مفورص

ما لقيت غير ستي مصحيتني من النوم و بتقولي افطر و البس بدك تروح معي مشوار عالبلد

كيفت انا لانه معناته في ساندويشات فلافل و رح اطلع من البلد بغنائم و العاب

والله ما في ربع ساعة ويلا انا جاهز للانطلاق ويلا امي بتقول لستي ليش بدك توخذية معك بلاش يعجب عليكي هاد النوري

ستي قالتلها وانا بجنبها انها بدها زلمة يدير بالو عليها، طبعا محسوبكو كعكي راسو ما كبر الا شوي

المهز.. بدت رحلتنا عل 8 الصبح و ركبنا جحش الدولة و ستي اشترتلي عصير و شبس من الدكان عشان اضلني مخروس برحلة الشتاء و الصيف، وصلنا للبلد اشترينا ساندويشات فلابس و بيبسي ومرينا على تريليون محل قماش و خضرة و شكلها يوميتها جدتي متفقة مع عمي انه يلاقيها بالبلد وحطينا المشتريات في السيارة و اخذنا بسيارتو وراح نزلنا بمحل غريب علي وقال لستي انا بدي نص ساعة وبرجعلكم و برجعم عالبيت....

ريحة المكان مقرفة بشكل كبير وستي ماسكه بايدي و مو راضية تفلتني من مرة...

بدينا ندخل المكان وعرفت وقتها ليش ستي مو راضيه تفلت ايدي... طلعنا رايحين المسلخ

صار صحاب المحلات يفتحو البراميل الكبيرة ويفرجو جدتي الروس والاجرين ول ول ول ول

وانا كعكي عشت فلم رعب مدة 141541454415 ساعة وهي بالحقيقة كلها نص ساعة ودموعي اقوى من مية البلدية الله وكيلكم والزلمة اللي نزل عل البلد عشان يحمي جدتو اختفى... ورجع القرد العيوط المفورص في تلك اللحظة الى ان وصلت الى حضن امى
وكانت هاي اخر مرة بنزل فيها عالبلد مع جدتي

طبعا طول الطريق واحنا مروحيين وعمي نازل في مسبات : اخص عليك، وانا كنت مفكرك زلمة و و و و

وكانت دراما مؤثرة بشكل كبير حتى اتت على تشويه منظري الى ما هو عليه في الاعلى وكوابيس لأكمن يوم

طبعا عرفت انه رح يطبخو هاي الاشياء يوم الجمعة، فاتصلت بمرة عمي و اترجيتها تتصل بامي عشان اروح انام عندهم ليوم السبت او الاحد و وعدت مرت عمي انه ما اتعربش على السلم و اوقع واطج راسي و:

ما العب بالطابة و اكسر الشباك تبع غرفة النوم

ما اتحركش ببنت عمي و اقص شعر الباربي تبعتها

ما اروح العب بالعمارة المهجورة وارمي حجار عالشارع.

للعلم سبب الذهاب لدار عمي حتى اتفادى القانون العرفي الذي ينص:

على جميع سكان المنزل ان يتواجدو في اوقات محددة على طاولة الطعام و على اكل ما يوضع في صحنهم بالكامل و يحق لجميع سكان المنزل ان يطلبو المزيد بادب و احترام بشرط ان يؤكل بشكل كامل. ولا يحق لاي احد  ابداء اي اعتراض على نوع او طعم الطعام الذي قدم لهم، و يتم الشكر لله لكرمه في توفير الطعام لسكان المنزل.

ومن يخالف القانون اعلاه سوف يتم تعريضه ل:

التعنيف اللفظي

التعنيف الجسدي

التعنيف اللفظي و الجسدي

الحرمان من المصروف و مزايا اخرى مثل التلفاز و الخروج من المنزل و اللعب مفي ساحة المنزل

جميع ما ذكر اعلاه

*ملاحظة: العقوبات المذكوره اعلاه للتعدديد فقط و ليست للحصر

ودمتم.

الجحيم هم Orange Jordan

جاي افش خلقي واسب على اورانج:
عدد المرات الي اتصلت عليهم عشان يوقفولي دعايات ال SMS غير معدودة وكل الوعود الي أخذتها من جماعة ال customer care الي هم اولا وآخرا جماعة لا يفقهون بعملهم مش شلن ولا تعريفة، ازا فلس منيح عليهم، ولهل اليوم وانا يوصلني مسجات.

Adsl كان منيح لحد ما صارت الأسعار تنزل، والسرعات تعلي، فلما صار عندي ٢mg صار الانترنت بطئ اكثر من العادة وصرت أترحم على ايام ٥١٢، ولما اشكي واحد يحكيلي انه جهازك يمكن عليه فيروس، ومرة المودم تبعك قديم وغيرولي اياه والحال من بعضه، مرة في ضغط علي المقسم الي عليه شابك، لحد ما طفشت من قرفهم ورحت افصله، قالولي لازم تتدفع لآخر السنة لانه العرض الي انتا عليه معاه التزام سنة، قلتلهم ما حد حكالي ، قالولي مكتوب بالعقد، طبعا قسما بالله العلي العظيم انه لما رفعت السرعة ما فرجوني العقد الى بعد ما عبوه وصورو الهوية وحكالي انه كل شي تمام بس وقع هون، وكمان قسما بالله انه ماحكولي انه لسنة. ولا استنضف يحكيلي اشي مع العلم انه كنت متحمم يوميتها وحالق وحاطط جاتوه.... يعني كنت مزه بالعربي ؛) انه يعني وز أب يا مان.
احكي انه ضل شهرين لنهاية العقد واستحملت قرفهم.
دبست الحج المودم وفكرة انه الحج يروح يلغي الاشتراك. يلعن ابو الانترنت والقرف تبع البرتقالة


طلع ال ٣ج وقلنا حلو، وصار عند كعكي تلفون اي فون هدية من امريكيااا من ابن عمي الي هاجر غاد واتجوز وحدة شقرة من دار اهلها وميش مشقرة يا خالتي، بنت حلوة بتحل عن حبل المشنكة يما، فكعكي صار بده يلعب عل ٣ج زي بقية الشباب الكول على طول،وما الك ٣ج الا مع البرتقالة المعفنة، وصار عندي ٣ج وصرت العب زي الشطار، الموهز يا جماعة الخير صار كعكي يكتشف انه الكريديت يطير مهاجرا بلا رجعة... بس ليش؟ حكينا من المحترمين وقالوليي الكريدت بطير لانه ال bundle خلصت وما جددتها .....

يعني يا اورانج يا محترمين يالي عندكم corporate social responsibility ويلي بتديرو بالكم علينا ويالي ما ابتنسو انه تبعتولي ٤ مسجات كل اول شهر عشان:
تذكروني انه فاتورة التلفون الي مسجل باسم كعكي الحج طلعت ولازم ندفعها
تذكروني انه فاتورة التلفون الي مسجل باسم جدي الله يرحمه طلعت ولازم ندفعها
تذكروني انه فاتورة التلفون الي مسجل باسم عمة كعكي طلعت ولازم ندفعها
تذكروني انه فاتورة التلفون الي مسجل باسم عم كعكي طلعت ولازم ندفعها
تسمو بدني مع كل تلفون بتصلوا: رصيدك يشارف علي الانتهاء، يرجى اعادة الشحن في اقرب وقت
يعني لو صحلي اشحن بشحن عشان اخلص من صوتك الي أنا بموت فيو
طب أقلك يا تبعت رصيدك يقارب على الانتهاء، والله بحس حالي متجوزك، بسمع صوتك والنق تبعك كثير، والله زهقت النق تبعك، بطل اللي نفس احكي مع حدا، لانه كل مرة بتسمعيني نفس الموشح، نفسي مرة تصبحي علي، كيفك حياتي، شو اخبارك، اتصل وتهنا يا عمري. والله بسمع صوتك اكثر من صوت اهلي، غيري الموشح شوي، وين الرومانس في حياتنا الزوجية، أنا كثير تعبت من صوتك، صرت أتمني واحد يسب علي ولا اسمع صوتك، خلص حياتي، بكفي قرف، صحابي قالولي ما اغلط واتجوز عليكي، قالولي كلهم زي بعضهم. قالولي زين وأمنية اللي حاطط عيني عليهم من نفس الطينة، لا تدور قالولي، أرضى باللي عندك واسكت.

اه وين سرحت أنا؟ فصرت أحط ريمايندر علي الماخوذ انه متي تنتهي صلاحية البندل، اه وبعدين قصة المسجات ال٤ اللي بيصلوني، ما أنا الخز النشيط تبع عائلة كعكي، بدفع فواتير العائلة الكريمة كلها بصفة انه بمر من جنب البرتقالة يوميا، اذا في مشاكل لهاي الخطوط بشتكي وبمر عليهم أنا.

طبعا ما عندهم اي مشكلة يبعتولي فواتير عل SMS ، بس السيستم تبعهم ما فيو اوبشن يبعت للناس انه البندل تبعتهم خلصت .... سبحان الله، بيعرج الجمل من شفته

صارلي فترة مضرب عن الانترنت، ولكن رجعت من يومين على البندلز وكذا و كانت المفاجئة الجميلة من البرتقالة المعفنة سحبو كل الرصيد تبعي ..... مع انو شاري حزمة ٣ج من يومين، قال شو ... السيستم تبعهم في مشكلة وعم بسحبو ٣ج من رصيدي، وبدهم ٤٨ ساعة وبعوضوني .... ورجعتلي زوجتي ام الموشح الي فكرت حالي أني ارتحت منها وبعتتها عدار اهلها أسبوعين زمن ....

روحي يا برتقالة يا بنت مجموعة الاتصالات الاردنية، اشوف فيكي يوم، واذا حدا بسألني عنك والله لاحكيلو انك اشرف من الشرف، عزيزة ومحترمة وبنت ناس، معجونة بالصدق و الشفافية واحترامك للآخر ، صادقة بمواعيدك، ما عندك اشي مخبا ابدا، بتفهمي كل حدا ايش إلو و تتناسي تحكيلو إيش عليه، صفاتك هاي نفس صفات بنات عمك، زين و أمنية الله يخليكم لبعض.

بس لو التويتر و وجه الكتاب برضو نبعتلهم ستيتس ابديت عن طريق الحمام الزاجل بس...

ولكون كيفكون بلوجسبوت بيبول والله اي ميسد يو سو متش، اي ويل بي اونلاين مور اوفن ناو سينس اي دونت هاف كريدت تو كول ماي فريندز ثانكس تو اورانج الروتن، هجز اند كيسيز تو افري ون