Bloggroll

Pages

Thursday, June 30, 2011

ظاهرة المعاكسات

كثير من الصبايا كتبو عن هذا الموضوع بس ما شفت شب كتب  من اللي بتبع عليهم

ايام المراهقة والمدرسة كان لازم تتمختر نافش ريشك عند مدرسة البنات
كان من الواجب انك تزت اكمن كلمة بلكي صاحبتلك وحدة حلوة
الكلمات كانت معظمها بريئة و بدائية في هذه المرحلة من العمر

بس مع مرحلة الثانوي الامور بتطور و نوع المعاكسات بصير اوسخ وممكن الشب يتجرا يعمل شيء ممكن يؤدي الى عواقب وخيمة
وللاسف جرأة الشباب تزداد مع جرأة الصبايا وقبولهم هيك تصرفات
بس هذا واقع الحياة والشباب والبنات عم بكبرو وبخوضو تجارب كثيرة
بس متي الولدنه بدها تخلص؟ صرت 18 بالغ عاقل راشد؟

معظمنا بنعرف المنيح والعاطل الي في الجامعات و الكليات بس وين الشباب و البنات المتوازنين والعاقلين؟
موجودون ولكن يختفو بسهولة وسط الكم الهائل من الانواع الاخرى من الشباب والبنات الموجودون في الجامعات

المعاكسات بنظري نتاج الفراغ والجهل والسطحية الي تربينا عليها وطريقة لاثبات الرجولة الزائفة ...والقانون والمجتمع يتجاهل معاقبتها وفي معظم الاحيان يمجدها

ليش انا بس اسافر بستحي اتطلع علي الصبايا الي طريقة لبسهم من النقاب الي ميني سكيرت الي ملابس السباحة؟
ليش الكل في حاله وغير مهتم بالى جنبه؟ ليش الامور طبيعية الي ابعد الحدود؟

ليش بعمان اي بنت بتمر لازم تعمللها سكانينج من فوق لتحت؟ وتطربها بالفاظ جارحة؟

معظم الناس بحكو ما في وازع ديني عند هذا الجيل
شو دخل الدين؟ لو انه ابنك وبنتك اتربو صح واتثقفو واتعلمو منكم كان الوضع غير هيك؟
اتعلمنا انه "الرجال قواموون علي النساء" ومثني وثلاث ورباع
علمتونا انه البنت شرف وعرض لازم نحمية، بس الله لا يرد البنات الثانيين... مو عرضنا هدول ولا شرفنا...

انا ما بلوم اي صبية او بنت او امراة لاي سبب من الاسباب عن المعاكسات الي ممكن تصير معهم حتى لو ماشية وجه الصبح من غير هدوم في الشارع.... ما تحكولي هيك مزبطة بدها هيك ختم
زي ما انا شاب عاقل بالغ راشد وقررت انه اعمل كذا و كذا
الانثي عاقل بالغ راشد وقررت انه تعمل كذا و كذا
وما بظن انه اذا الشب لبس شورت قصير الي طوله شبرين رح يسمع كلام جارح من بنات العالم

وفي ملاحظة جانبية انا عامل دايت 
لا كعك لكعكي حتي عيد الفطر

4 كعكيات:

sheeshany said...

عامل كما تحب أن تُعامل :)

ببساطة :)

يسلمو كعكوووووووووو

:)))

و أنا مستعد أساعدك بالدايت

إبعثلي كل شيييييييييييي!

بخبيهم "بكرشي" للعيد

و لاااا يهمك

نيسآان said...

ء"ليش انا بس اسافر بستحي اتطلع علي الصبايا الي طريقة لبسهم من النقاب الي ميني سكيرت الي ملابس السباحة؟"

معلش اخالفك في هاي النقطه...اللي بيسافروا بيتطلعوا ويتطلعوا كتير كمان....لكن ما بيسترجوا يعاكسوا او يتحركشوا....لانه القانون عندهم رادع وفيها بهدله مرتبه للرجل...مش زي هون....البنت هي اللي ح تتبهدل وتنلام على لبسها ولو كانت مستوره ح يشككوا بتصرفاتها وانها مايعه وهي اللي شجعت

بينما سأوافقك بشده على هالكعكه
"المعاكسات بنظري نتاج الفراغ والجهل والسطحية الي تربينا عليها وطريقة لاثبات الرجولة الزائفة ...والقانون والمجتمع يتجاهل معاقبتها وفي معظم الاحيان يمجدها"

المجتمع ما بيعودنا على ان كل واحد حرّ بحاله ومسؤول عن تصرفاته....والقانون ما بيعمل شي يخفف من هالتصرفات....بالعكس مرات الشرطه أنفسهم اللي بسيارات النجده بتلاقيهم بيعاكسوا بكل وقاحه

كعكي said...

شيشاني
الله يهدينا جميعا

يعني لو في كعك رح اعمل دايت؟
ماكو كعك عيني

كعكي said...

نيسانه
كلمة السر المجتمع
ههههاااا
عمرنا ما رح نصير بشر شكلو

انا رح اعمل زيارة مكوكية على البلوجات تومورو افترنون بعد المغرب انشالله
حظري حالك ما تطلعي من البلوج ولا تنسي تحطي كعك الله يرظي عليش يما

Post a Comment