Bloggroll

Pages

Tuesday, June 21, 2011

موسم التزاوج القرف

اسمعوا علي مليح عاد
شو هالقصة الطرمة الي مو راضية تخلص
شو يا جماعة الخير كلكم صرتو مستزوجين؟ شو؟ حلو عن سمانا يااااااا
من 3 اسابيع وجاي كل يوم والثاني حدا بدو يتجوز من العيلة الكريمة و المعارف
افتتتتتتتتت والله حللت حق البدلة بهل الاسبوعين هدول صار بدها رثي
شههه قبل شهرين جارتنا المصوصية بتشكي ضيق الحال لامي
وقبل اكمن يوم جوزت ابنها النضوة في احد الفنادق ام الخمس كعكات
بس يا خوفي يرجع من شهر العسل و يلعب مع اولاد الحارة
بدددددددددييييييييييييششششششششششششش اروح على اعراس و خطبات
 خلص خلص خلص بكفي بأه خلاص كدا ارحموني يا ناس

وما رح اروح على اعراس غير مختلطة مش لاني عيني زايغة
لاني قرفت شوفت الشباب الي بترفع الراس و قزيت من سواليف الرجولة التي تتلخص في:
1-نوع السيارة الي معه
2- عدد البنات اللي بتعرفهم
3- ميسي ولا رونالدو البين يطسهم الجوز
4- سعر الاراضي و مين ورث و مين باع و مين اشتري
5- لا ما الي صالح في قطعة سلاح
6-لا ما بشرب ولا بدي اجربه
7- البنت اللي بتجيب بسيرتها تربت معك في نفس الدار يا محترم
8- لا انا مو مع اللاصلاح و لا مع المواليين ولا الي مصلحة تشبكني مع فلان الفلاني

لازم اصير ____ كبير بالحكومة والغي الجواز والخطبة في الصيف
الي بدو يندفس، يندفس بالشتااااااااااااااااءانا بكون في سبات طويل و ما بحسن اعمل شي منوب ها... الله يرضى عليكن

بس بيني وبينكم يا بلوجريين اشتريت بدلة رقم 4.... يا ويلييييييي شو طقع انا طلعت حلو وجميل و هاندسم يعني الله وكيلكم البدلة مو محزئة ولا واسعة، لا طويلة ولا قصيرة ولونها اسود مثل سواد الليل والها زر واحد مو زرين وانه ما بتتسكر
يعني يخزي العين عني و الدليل انو جدتي  قالتلي يا مفعوص نساوين سألت عني اكثر من مرة وشو بشتغل وكذا بعد ما شافوني وانا بساعدها تمشي لجوة

 وديني ماني متزوز بالصيف انا بدي اتزوز بالشتا
ايه السلام عليكم

32 كعكيات:

كعكي said...

وشو معني <3 ?

كعكي said...

كعكي؟
ابتعرف انك لزيززز و كووللل؟

كعكي said...

سانك يو
شو اللي بدك اياه؟

كعكي said...

ولا اشي
ياللا فوت نام جوا

كعكي said...

حاضر
تصبح على خير
أتأكد من البواب مسكرة و تنساش تحط المنبه

كعكي said...

صار
مع القلعة
حل وسكر الباب وراك

كعكي said...

إحنا زغيرين وادينا زغيرين
والكرة بتاعتنا وقعت في البرميل لاي لاي
يلا بينا يا لؤلؤة؟
يلا بينا يا لؤلؤ

كعكي said...

صبر جميل والله المستعان

كعكي said...

كعكي أنا مو عارف أنام
احكيلي قصة

كعكي said...

قصة تحك جنابك
سكر الزفت ونام لاخلي ليلتك سودا

كعكي said...

يا مامي
شعري الأزرق عم برج من الخوف
يا مامي

كعكي said...

الله يجيبك يا طولت الروح
قوم نام جوا الله يهديك

كعكي said...

حاضر
نايتي

سنفورة said...

حلو البوست... أول مرة حدا بيعطينا سكووب عاللي بصير جوووا صالة الشباب هههه بصراحة معك حق تقرف من الأعراس. وألف مبروك عالبدلة ان شاء الله بتشوف الخير عليها

بس اللي محيرني..... التعليقات :|

sheeshany said...

شو بالنسبة للتعليقات أول شي!

لووول

و بعدين ف"ظ"حتنا! لويش بتكشف أسرارنا

سنحك

و شكلك غيراااااااااااااان
مش أكثر

استلم إزعاجات من هوووووووووون لرمضان يا سيدي و بعدها بوعدك إزعاجات رمضانية من نوع آخر

خخخخخخخخخخخخخ

Anonymous said...

مفصوم؟!؟!؟!؟

w7l said...

مرتبط بالشب ؟ اذا لا , بدي اعرفك على جارتنا ام علي لانه ابنها بدو يجوزها

نيسآان said...

لوووووول يا كعكي وكمان لوووول

عن جد شكلو الاعراس والخطبات مأثره مش بس على حالتك النفسيه ....وعلى عقلاتك كمان:)) على رأي صاحبنا نادر :لااااااسع :) اقرأ البوست هذا عشان تعرف شو قصدي
http://osbo3yatjaber.blogspot.com/2011/06/blog-post_15.html
بس عن جد ...معك حق
الاعراس هالايام مساخر وكلها كوبي بيست عن بعضها بس كأنهم بيبدلوا العرسان وبيرجعوا بيعيدوا الشريط من الاول
نفس ترتيب الاحداث ,,,نفس الوجوه,,, نفس القصص الطرمه,,, نفس الموديلات العجبه ,,,نفس الاغاني,,, نفس الكيك شو واللذي منه.....قلبتوا منافسنا ....شيل غاد!!!!

Rain said...

و انا كمان أول مرة بعرف شو بيصير عند الزلام
بحسهم بيقضوها تسليم عبعض
يلا شكلو عنا طلع أهون افتر أوول يعني اذا بتضلك قاعد بعيد شوي و ما بتختلط بالنساوين ممكن تقضي وقت حلو تلعب فيه سودوكو و جميع الألعاب المتوفرة بموبايلك
أما عندكوا ما في مفر
:سمايلي شمتان:

هلكتنا و انت بتتغزل بحالك يسعد رب التواضع بس

حششت عكلمة مصوصية جد وقعت عضهري من الضحك
هاي كلمة مخصصة بماما

كعكي said...

@اسيل
مرحبا بك في كعكة كعكي

بالنسية للتعليقات لا تاخذيني
الدنيا شوب ولسا ما اجا وقت جز صوفي
الحج بقولي استنا لاول رمضان
وانا من كثر الشوب ما عرفت انام
وكنت بسولف مع حالي من القزز

يلا شسدي حيلك انتي او اي صبية واكتوبيلنا بوست عن شو بسير جوات قاعة البنات

كعكي said...

@anonymous
اضهر وبان عليك الامان
اه مفصوم الله وكيلك
ماكو دوا عنا عيني

كعكي said...

@شيشاني
سنحي 100 مرة و كمان مرة
بس مو غيران
شوفي بعد رمضان؟
جولة ثانية من القرف؟

كعكي said...

@دكتور
الشب في مشكلة الله يشفيه
متخرج و ما بشتغل
وطول نهاره بلعب مع ولاد الحارة الصغار

ما ودي اتجوز
بلكي علموسم الجاي؟
اسالها ازا بتستناني
يا خوفي بدها اياني طمع

كعكي said...

@نيسانه
لأ اختي
بعدني ما انلسعت
بس قرفت من نفس الديباجة
صرنا نحكي للشسباب يلا بشوفك بخطبة او جوازة فلان او فلانه
بدل يلا بكره بنطلع نتخمخم و بنشرب قهوة المسا

كعكي said...

@رين
بس بلاشششششششششششششششش
ما تخليني افضح المستور علي بصير عندكم بالصالة
والله ما بنطلع نقطة ببحركم

بالنسبة للتواضع
اسم الله علي و حولي
بس بصراحة نصف متناهية
هاي اللبدلة اشتريتها انا لحالي
يعني ما حدا قلي اه و لا لاء
فعشان هيك انا مبسوط عحالي

لانو اكثر من جينز و تشيرتات سبونج بوب ما بعرف اشتري لحالي

انا عندي فروت نينجججججججججججججااااا
على تلفوني
نا نا نا نا نا

sheeshany said...

.. جولات من الإزعاجااااااااااااااات!

كعكي said...

@هيثم
شكلو بعد العيد
رح اخذ اجازة
واتخمخم في امارات وسبورة المتحدة
او برقدا في درعا او حلب

w7l said...

سوريا؟!!! كيف لسوريا بدك تروح!!؟ ليكون الك ميول كعكي لاحزاب او نقابات اكلي الكعك؟

كعكي said...

@دكتور
سعري بسعر كروز دخان
الي بدخل الدخان من الحدود بطلعني برا الحدود
انا لست مشتركا باي حزب او نقابات
بس للعلم طلبت الانتساب لنقابة الاطباء الاردنية
بس ما رضيو
اقال شو؟ لازم اكون دكتور
العنصرية و التفرقة مزروعة و معجونه عجن فينا

w7l said...

لا انسى نقابتنا ، فكك منها ، مش طلعت مقلب كبير نقابة الاطبا!؟

اذا بتدبرلنا واسطة من جماعتك بلكي اشتركنا بنقابة المهندسين

Rain said...

أنا لا تسألني الأعراس عندي زي محاضرة العلوم العسكرية لا أسمع لا أرى لا أتكلم

و ما هو أنا حاولت أرتقي بمستوى الوظع بس لقيت انو ما بقدر أجيب ال
game boy
معي عالعرس

مبروك البدلة،انا كمان عندي تي شيرت سبونج بوب
;D

Whisper said...

بصراحه بالرغم من انا بنشوف العجب العجاب بالاعراس بقاعة الستات بس بضل احسن من قاعه التدخين و الحكي السياسي اللي بتكونو فيها

كله كوم و التعليقات كوم
يعني صورة واضحه للانسان اللي مش طايق حاله :)

بتنور الامارات بزيارتك :)

Post a Comment