كعكي والفوبيا

كعكي اكتشف بعد تمنتعشر سنة في سنوي
أني عندي فوبيا من الاماكن الصغيرة المغلقة

بابا كعكي اجاني الصبح وبقلي إلك ولا للذيب
قلتلو خسا الذيب

قال لي البس شورت والحقه على السطح
طلع الحج كعكي بدو انو انا انضف الخزانات
المهم قلتلو من عيوني يا ابو كعكي انزل وارتاح وما يكونلك فكر
ففضيت الخزان الاول
و دخلت جوا الخزان
بعد اقل من دقيقتين كنت طالع ودموعي عخدي
ما قدرت أتحمل فكرة وجودي جوا الخزان وانضغطت بسرعة متناهية وبس بدي اطلع
هديت شوي ونزلت قلت لابوي الدنيا نار وما قدرت اتحمل، بعد الظهر بنضفهم على كيف كيفك
ولا يكون لك فكر يا حجي

بعد الظهر
مامي ودادي شدو الرحيل على عرس بعرفشمين ابن عم هظاك الي مأخذ بسة بنت عم هدولاك الناس
فتحت الوسيط واتصلت ع واحد وجبته ونضف الخزانات واتسهل في ساعة زمن

أجا الحج وشاف الخزانات وعجبوا الشغل والله يرضي عليك والله انك جدع وزلمة
وانا تسلم يا حج تعليمك والله يخليلي اياك و و و

نزلنا واشربنا شاي وقاعدين بامان الله والله الحج اتصل بمامتو اللي هي بتكون جدتي
ويسولفو وبعرفشو وحكي حصيدة واللي منو
وما اسمع الى أبوي بقول لجدتي يوم الجمعة الجاي كعكي جاي ينظفلك خزان المية
فما تظخوا مية كثير فوق
رح يجي بعد الظهر بس تهدى الشمس

انا بدي اعيط